Haustrally BIKR og smá samantekt á árinu

Haustrall

Þá er keppnistímabilinu 2008 lokið með haustrallinu sem fram fór í hefðbundinni haustrigningu og akstri um drullupolla Djúpavatnsleiðar. Veðrið var þokkalegt sem meira en hægt er að segja um ástand Lancerins sem enn var með brotið drif þar sem íhlutir höfðu ekki komið í tíma.

Nú þá er bara að bjalla á vini sína hjá www.tomcat.is og leigja eitt stykki jeppa. Eftir talsvert ánægjulegt prútt sem aðalega gekk út á að ná verðinu upp í sanngjarnt þá var 8cyl græjan komin heim á plan og við Björgvin farnir í prufutúr. Tomcat er klikkað aparat fullt af fjöri og allt allt annað en Lancer sem liggur við götuna, mikill kostur að geta ekið yfir hvað sem er án þess að hafa áhyggjur af hlífðarplötum eða botni bílsins. 

Rallið sjálft var lítið í sniðum og aðeins tvær 36km leiðir þar sem ekið var um Ísólfskála-Djúpavatn-Kleyfarvatn í einni bunu. Það bókstaflega lak af manni svitinn eftir fyrstu ferð við að reyna sitt ýtrasta til að hafa stjórn á 8cyl græjunni sem í mínum höndum fór minnst beint, en það var gaman, rosalega gaman!Fyrir seinni sérleiðina var hjólastillingum breytt af Tomcat liðinu og ég reyndi að aka agað og í raun reyna minna. Þetta skilaði okkur rúmlaga 100 sekúndna bætingu í tíma og við fengum smá nasarsjón af þvi hvað jepparally er. Fyrir okkur var rallið alltof stutt en hryllilega gaman og aldrei að vita nema það verði bara Tomcat að ári?

Samantekt

 Árangur og væntingar er eitthvað sem allt íþróttafólk og áhorfendur mynda sér hvort sem er um árangur landsliðs á stórmóti eða eigin þátttöku í skemmtiskokki. Okkar árangur í ár stóð ekki undir þeim væntingum sem uppi voru þegar nýja bifreiðin var keypt og byggðust á þeim hraða sem náðist á gamla EVO5 Lancernum 2007. Innistæða var fyrir talsvert háum væntingum og tilkall til toppsæta eðlilegt. Þetta breyttist allt á sama augnarblikinu þegar bak mitt fór um áramótin, þá hljómuðu endurstilltar væntingar uppá að komast í fyrstu mótin og ná í reynslu á nýjan bíl ásamt einhverjum stigum í hús. Seinni hluti tímabilsins átti að vera sem næst fullri ferð. Það fyrra gekk eftir, náðum stigum og bíllinn, hann er algert æði. Það sem ekki stóð undir væntingum var seinnihlutinn, 4 umferð var sú fyrsta sem við náðum leiðarskoðun fyrir en hraðinn bara kom ekki og þungt í manni að ralli loknu. Við lentum síðan í bilunum seinustu tvær þó við hefðum getað skemmt okkur á Tomcat seinustu umferðina, það bjarta var reyndar hraðaaukning sem gerði vart við sig þann tíma sem við vorum inni í Rally Reykjavík. 

 

Fyrir næsta ár, ja EVO7 er í skrúrnum í topp standi og allt getur gerst. Við látum efnahagsstorminn ganga yfir og tökum stöðuna þegar líður á veturinn. Það eru 16 túrbó 4x4 bílar að keppa og við vorum í miðjum hóp ekki í formi 2008 þannig að 2009 verður bara gaman í betra formi. 

MfG: Jói V